The Ben ugeze kure imyiteguro y’igitaramo ‘The New Year Groove’ agiye gukora ku nshuro ya kabiri, yagiteguje abakunzi be mu buryo budasanzwe yifashishije amafoto y’abantu babiri bameze nk’abagiye kurwana mu mukino w’iteramakofe.
Bijyanye n’uko iki gitaramo yagitumiyemo Bruce Melodie bari bamaze iminsi bigaragaza nk’abahanganye mu muziki nyarwanda, ku mbuga nkoranyambaga batangiye kwibaza niba aba bahanzi bagiye guhanganira mu gitaramo.
Amakuru ahari avuga ko iki gitaramo kizafatwa nk’intambwe ya mbere yo guca impaka zari zimaze igihe, benshi bibaza umuhanzi ukunzwe kurusha undi muri aba bombi.
Ni igitaramo amakuru ahari ahamya ko bahaye akabyiniriro ka ‘Who is the best’ cyangwa se ‘Ni inde mwiza’ impaka zikazacibwa n’abakunzi b’aba bahanzi ku munsi w’igitaramo.
Uyu muhanzi atangiye kwamamaza iki gitaramo nyuma y’uko mu minsi ishize bimenyekanye ko yaba The Ben na Bruce Melodie bamaze gushyira umukono ku masezerano azabahuriza mu bitaramo.
Icyakora nubwo bemeranyije gukorana ibitaramo, buri wese ahanze amaso abakunzi be muri buri kimwe mu kwerekana ko ariwe uhagaze neza mu kugira abafana benshi.
Byitezwe ko nyuma y’iki gitaramo, The Ben azifatanya na Bruce Melodie mu bitaramo bizenguruka Igihugu ateganya gukora mu 2026.
Kugeza ubu The Ben ari mu myiteguro y’igitaramo ngarukamwaka yise ‘The New Year Groove’ yatangije umwaka ushize, kikabera muri BK Arena ku wa 1 Mutarama 2025.
Ni igitaramo umwaka ushize yari yatumiyemo abahanzi batandukanye biganjemo abo mu Rwanda ndetse na Otile Brown wari waturutse muri Kenya.