RMC yihanangirije itangazamakuru rya siporo ryayivanze n’amatiku

Urwego rw’Igihugu rw’Abanyamakuru Bigenzura (RMC), rwihanangirije abanyamakuru bakora inkuru n’ibiganiro bya siporo, rubibutsa ko bagomba kubahiriza amahame ngengamyitwarire y’umwuga w’itangazamakuru mu Rwanda.

Ni kenshi inkuru zikorwa muri siporo zinengwa cyane n’abakurikira ibitangazamakuru biba byazitambukije, kuko akenshi biba bitubahirije amategeko agengwa umwuga w’itangazamakuri.

Mu itangazo ryashyizwe hanze na RMC kuri uyu wa Mbere, tariki ya 17 Ugushyingo 2025, ryibutsa abanyamakuru zimwe mu ngingo batajya bitaho bakwiriye kunoza.

Yagize iti “RMC iributsa abanyamakuru bose bakora inkuru n’ibiganiro bya siporo kuri radiyo na televiziyo ko bagomba kubahiriza Amahame Ngengamyitwarire y’Umwuga w’Itangazamakuru mu Rwanda, by’umwihariko ingingo za 2, 3, 4, 6, 9, 11, 13, 14, 16 na 23.”

Abanyamakuru basabwe ko imiyoboro ya radiyo na televiziyo itagomba gukoreshwa nk’urubuga rwo kwihimura, gutukana cyangwa gutesha agaciro abantu cyangwa inzego bafitanye amakimbirane, kuko binyuranye n’inyungu rusange n’amahame y’umwuga.

Ivuga ko mu biganiro cyangwa mu isesengura rya siporo, umunyamakuru yirinda amarangamutima akomoka ku makipe afana, ahubwo ari ngombwa gutanga amakuru mu buryo buboneye, butabogamye kandi bushyira imbere ukuri n’ubunyamwuga.

Abanyamakuru basabwe kwirinda kwibasira abantu ku giti cyabo babibasira; basabwa kudatangaza amakuru bahawe n’abafana cyangwa andi batagenzuye ukuri kwayo; no kutabangikanya umwuga w’itangazamakuru n’ubuvugizi bw’amakipe.

RMC itagize uwo itunga urutoki, yashingiye ku burebure bw’ibiganiro bya siporo bimara igihe kirekire, isaba abayobozi babyo kubanza kubitegura kugira ngo bibe birimo amakuru yizewe kandi afite ishingiro.

Usibye abanyamakuru, RMC yasabye abayobozi b’amakipe, amashyirahamwe ya siporo n’abandi bayobozi mu nzego za siporo, kuzirikana inshingano zo gutanga amakuru ku banyamakuru igihe cyose bayasabwe.

Abanyamakuru batazubahiriza ibyavuzwe muri iryo tangazo, bibukijwe ko “bazahanwa nk’uko biteganywa n’Ingingo ya 29 y’Amahame Ngengamyitwarire y’Umwuga w’Itangazamakuru mu Rwanda.”