Ku wa 25 Ugushyingo 2025, Urwego rw’Igihugu rushinzwe Imiyoborere (RGB) rwatangaje ko ruhagaritse inzego zose zari ziyoboye Umuryango Rayon Sports, kubera ibibazo byakomeje kugaragara mu miyoborere y’iyi kipe.
Ibi byatangajwe nyuma y’inama yabereye ku cyicaro cya RGB, yahuje ubuyobozi bw’uru rwego n’abagize inzego zitandukanye za Rayon Sports zirimo Inama y’Ubutegetsi, Komite Nyobozi, Komite Ngenzuzi ndetse n’iyari ishinzwe gukemura amakimbirane.
Mu itangazo ryasinyweho na Paul Muvunyi (wayoboraga Inama y’Ubutegetsi) na Twagirayezu Thaddée (Perezida wa Komite Nyobozi), hemejwe ko ubuyobozi bwariho buhagaritswe, bugasimbuzwa komite y’agateganyo.
Iyi komite nshya iyobowe na Murenzi Abdallah, wari Umunyamabanga w’Inama y’Ubutegetsi, akaba ari na bwo bwa kabiri ashyizwe muri uyu mwanya nyuma y’uko byabaye mu 2020. Afatanyije na Musabyimana Jean Baptiste, Gakwaya Olivier, Akayezu Josée na Me Nubumwe Jean Bosco.
Komite y’inzibacyuho yahawe amezi atatu yo kuvugurura amategeko agenga Umuryango Rayon Sports ndetse no gushyiraho umurongo mushya w’imiyoborere.
Ni ubwa kabiri RGB ifata iki cyemezo kuri Rayon Sports, nyuma y’uko ibibazo nk’ibi nabwo byagaragaye mu 2020.
About the Author
