Rayon Sports yasohotse ku rutonde rw’Ishyirahamwe ry’Umupira w’Amaguru ku Isi (FIFA), mu makipe yafatiwe ibihano byo kutandikisha abakinnyi nyuma yo kutubahiriza ibyo yasabwe ubwo yatsindwaga imanza yarezwemo n’abari abakozi bayo.
Kuri uyu wa Kabiri, tariki ya 11 Ugushyingo 2025, hashyizwe hanze amakipe yafatiwe ibihano kubera amakosa yakoze yiganjemo kwirukana abakozi mu buryo bunyuranyije n’amategeko.
Aya makipe arenga 150 yo muri Afurika ni yo yahawe ibihano, muri yo harimo Rayon Sports FC yo mu Rwanda yarezwe kabiri mu Ukwakira 2025.
Icyo gihe yarezwe n’Umunya-Brésil Roberto Oliveira Gonçalves do Carmo ’Robertinho’, wayireze ayishinja kwirukanwa binyuranyije n’amategeko ndetse inamubereyemo umwenda.
Icyo gihe Rayon Sports yategetswe kumwishyura ibihumbi 22,5$ [arenga miliyoni 30 Frw], ariko kubera kutishyura yahawe ibihano byo kumara inshuro eshatu itemerewe kwandikisha abakinnyi bayo.
Rayon Sports yahanwe inshuro ebyiri kandi yarezwe na rutahizamu ukomoka muri Guinea-Bissau, Adulai Jalo.
Andi makipe yo muri Afurika yafatiwe ibihano arimo Nyasa Bullets, KenGold SC, Township Rollers, AS Arta Solar7, Coto Sport de Garoua, TS Galaxy, Pretoria Callies, Welkite Kenema FC, SCCM, Ismaily SC, Zamalek, Enyimba FC na Club Sportif Sfaxien.
About the Author
