Minisiteri y’Ubucuruzi n’Inganda yatangaje ko yinjiye mu kibazo cya moto z’amashanyarazi z’uruganda Spiro, zimaze igihe zishinjwa ibibazo bitandukanye bijyanye n’ubuziranenge bwazo.
Moto z’uru ruganda ni zimwe mu zimaze kumenyekana ku isoko ry’u Rwanda, cyane cyane kuva rwafata icyemezo cyo kwimakaza ikoreshwa ry’ibinyabiziga by’amashanyarazi.
Mu nenge abakoresha moto za Spiro cyane cyane abamotari bamaze igihe bagaragaza harimo ikibazo cya bateri zishyuha cyane, kuba zitakibika umuriro igihe kinini ndetse no kuba abakeneye ibikoresho byo gusimbuza igihe ibindi byangiritse bagorwa no kubibona. Ibi bibazo bya bateri ngo bishobora no kugira ingaruka kuri feri z’iyi moto.
Mu itangazo MINICOM yashyize hanze ku wa 11 Ugushyingo 2025, yavuze ko “Minisiteri y’Ubucuruzi n’Inganda (MINICOM) iramenyesha Abanyarwanda bose ko yakiriye ibibazo byagaragajwe n’abakiliya ba Spiro, kandi ko ku bufatanye na RICA, RSB, RURA na MININFRA biri gukurikiranwa kugira ngo bishakirwe ibisubizo.”
Binyuze mu itangazo Spiro yashyize hanze ku wa 8 Ugushyingo 2025, yavuze ko izi bimwe mu bibazo moto zayo zifite, ndetse ishimangira ko hari ibyo yatangiye gushakira umuti.
Yavuze ko hari bateri zishobora kugira ibibazo, ko “ariko iyo bigaragaye zihita zihindurwa. Ndetse ibikorwa bikomeje byo kuzivugurura byahinduye imikorere yazo”.
Uru ruganda rwavuze ko ikibazo cyakunze kubaho cyo kubura kw’ibikoresho by’izi moto cyakemuwe, ko kandi gufungura ikigo giteranya izi moto mu Rwanda byoroheje ibijyanye na serivisi zo kuzikanika.
Spiro yatangiye gukorera mu Rwanda mu 2022, kuva icyo gihe moto zayo zirenga 1300 zibarizwa mu mihanda yo hirya no hino mu gihugu.
About the Author
