Minisitiri w’Ububanyi n’Amahanga, Amb. Olivier Nduhungirehe, yatangaje ko u Rwanda rudateze gukuraho ingamba z’ubwirinzi rumaze igihe rwarafashe, keretse Repubulika Iharanira Demokarasi ya Congo nisenya umutwe w’abajenosideri wa FDLR.
Minisitiri Nduhungirehe mu kiganiro yahaye Radiyo Mpuzamahanga y’Abafaransa (RFI), yavuze ko gusenya uriya mutwe ari na byo bizatuma uburasirazuba bwa Congo bubona amahoro.
Asubiza Minisitiri Patrick Muyaya uheruka gutangaza ko nta mahoro afatika azigera aboneka keretse u Rwanda ruvanyeho ingamba z’ubwirinzi, Nduhungirehe yagize ati: “Patrick Muyaya akwiye gusoma amasezerano ya Washington. Nta mahoro azabaho keretse abajenosideri ba FDLR bashyigikiwe bakanaterwa inkunga y’amafaranga na Kinshasa, yemwe baninjijwe mu ngabo basenywe; nk’uko gahunda y’uko ibikorwa bizakurikirana biri muri gahunda y’amasezerano ya Washington ibisaba. Isenywa ry’abo ba Jenosideri bikozwe na Kinshasa ni ryo rizafungurira amarembo gukuraho ingamba z’ubwirinzi z’u Rwanda.”
Minisitiri Nduhungirehe yateye utwatsi ibivugwa n’abategetsi ba RDC ko gusenya FDLR no kuyambura intwaro bigomba kubimburirwa no gukuraho ziriya ngamba.
Ati: “Ibyo si ukuri. FDLR iracyari hariya, igomba gusenywa nk’uko amasezerano y’amahoro ya Washington abisaba. Muribuka itangazo rya FARDC yahamagariye FDLR kurambika intwaro hasi, nyuma FDLR yasohoye itangazo ibeshya ko yiteguye kurambika intwaro ikishyikiriza MONUSCO, ariko ko yabujijwe na M23; hanyuma mwabonye ikiganiro cy’umuvugizi wa FDLR wavuze ko batazigera barambika intwaro, ko bazakomeza kurwana kugeza ku munota wa nyuma. FDLR iracyahari kandi ifashwa na Kinshasa; icyo dusaba ni uko isenywa nk’uko amasezerano ya Washington abivuga.”
Umukuru wa Dipolomasi y’u Rwanda yavuze ko ibiganiro byerekeye gusenya FDLR bikomeje gukorwa n’inzego zashyizweho ngo zihuze ibikorwa by’umutekano biri mu masezerano ya Washington, hakaba hari icyizere cy’uko uriya mutwe ushobora kuzasenywa nk’uko amasezerano abiteganya.
Yavuze kandi ko gusenya uriya mutwe bizaturuka ku bushake bwa Politiki bwa Leta ya RDC imaze igihe yarawinjije mu ngabo zayo, ashimangira ko amasezerano ya Washington ateganya ko FDLR igomba gusenywa, aho gusohora amatangazo asaba abarwanyi b’uriya mutwe no kubahanagarira gutaha bikorwa na RDC.
About the Author
