Kigali Universe isanzwe iberamo ibitaramo bitandukanye bikomeye yanabereyemo icya Papa Cyangwe giheruka cyasize umugani, yanyomoje amakuru avuga ko uyu muhanzi yahafungiwe, ahubwo yamushyigikiye ikanamwishyurira agera kuri miliyoni 5 Frw.
Bikubiye mu itangazo rigenewe abanyamakuru yashyize hanze, yavuze ko yakoze kubera amakuru y’ibinyoma aheruka kujya hanze, atangajwe n’uyu muhanzi.
Papa Cyangwe yavugaga ko nyuma y’igitaramo yahakoreye yahahuriye n’ibibazo birimo gufungwa ndetse mu mafaranga yose yinjijwe mu gitaramo cyabaye, ntabone n’ijana.
Kigali Universe yatangaje ko nyuma yo kubona amakuru y’ibinyoma yatangajwe na Papa Cyangwe nyuma y’igitaramo cyo ku wa 22 Ugushyingo 2025, yifuza kumenyesha Abanyarwanda ukuri kwa nyako.
Iri tangazo rivuga ko Uwiringiyimana uzwi nka Papa Cyangwe yasabye Kigali Universe ko yahakorera igitaramo. Nk’uko Kigali Universe ari igicumbi cy’imyidagaduro itazuyaje ihita imwemerera kukihakorera ku buntu.
Mu byo bemeranyijwe nyuma yaho harimo ko Kigali Universe yagombaga kumuha icyumba cyo gukoreramo igitaramo ku buntu, amacupa abiri ya G69, ikarito y’amazi imwe, uburyo bw’ikoranabuhanga bwo gucuruza amatike ndetse no kwamamaza igitaramo.
Rikomeza rivuga ko Papa Cyangwe we yagombaga gushaka no kwishyura ibikoresho by’amajwi, amatara yabugenewe, urubyiniro, ibijyanye no kurimbisha ahabereye igitaramo, abashinzwe umutekano, abashinzwe protocole, abakora amasuku n’ibindi byose bitagombaga kuzakorwa na Kigali Universe. Ibi byongeye kwemezwa n’impande zombi, ndetse Papa Cyangwe anahabwa amasezerano.
Impamvu ibyuma byahagaritswe
Iri tangazo rigira riti “Mu gihe igitaramo cyari kigeze hagati, amajwi yaje guhagarikwa n’uwo Papa Cyangwe yari yakodeshejeho ibikoresho kubera ideni rya 1.200.000 Frw atari yabashije kwishyura ndetse atanabimenyesheje Kigali Universe. Kugira ngo igitaramo kidahagarara, Kigali Universe yashyize hamwe impande zombi bumvikana ko ayo mafaranga aza kuvanwa mu byo Papa Cyangwe aza kwinjiza cyane ko ari we wari ufite mu nshingano kugena abinjira.”
Bivugwa ko ayo mafaranga yaje kuvanwa mu byari byinjiye ariko bikaza kugaragara ko bitaza gukunda ngo ayishyure anishyure Kigali Universe, kuko nyuma y’igitaramo hasagukaga gusa ibihumbi 400 Frw.
Ngo Papa Cyangwe yemeranyijwe na Kigali Universe kwishyura ayo mafaranga uwazanye ibyuma maze agasigaramo ideni ry’ibihumbi 800 Frw, ndetse abishyiraho umukono anabyemera.
Nk’uko Papa Cyangwe yagiye abivuga ko yafungiwe muri Kigali Universe, itangazo rivuga ko nta gufungwa cyangwa gufatwa kwabayeho ahubwo yari ari kuganira na nyiri ibyuma ndetse anategereje ko hakorwa ibaruramari harebwa amafaranga yinjiye, ayo yagombwaga n’ayo yagombaga ahabereye igitaramo na nyiri ibyuma.
Itangazo riti “Amakuru avuga ko Papa Cyangwe “yafunzwe” muri Kigali Universe ni ibinyoma byambaye ubusa. Nyuma y’igitaramo habayeho gukora ibiraruramari nk’ uko bisanzwe bikorwa , icyo gihe cyose yari afite telefone aganira n’inshuti aganira na nyir’ibyuma ngo hafatwe umwanzuro w’uko agomba kumwishyura.”
Rikomeza rivuga ko Papa Cyangwe yanaganiraga na nyir’ibyuma kuko atari ari muri Kigali Universe ahubwo yari ari ahandi yari afite akazi, baganiraga kuri telefone ndetse birangira bemeranyijwe ko Papa Cyangwe agomba kumwishyura ibihumbi 400 Frw ndetse n’andi ibihumbi 800 Frw yari yasigaye agomba kwishyurwa ku wa 25 Ugushyingo 2025.
Kigali Universe iti “Iyo Papa Cyangwe aba adatekanye cyangwa afashwe bugwate, yari guhamagara inzego z’umutekano zirimo Polisi ariko ntiyabikoze. Bikaba bivuguruza icyo kinyoma yatangaje.”
Itangazo rya Kigali Universe rivuga ko yatanze ubufasha burenze 5.000.000 Frw harimo no kwishyura ibyo umuhanzi yagombaga kuba yiyishyuriye. Rivuga iyi nyubako yashyinzwe na Coach Gael yasizwe icyasha bityo ikaba yiteguye kugana inzira zirimo n’iz’amategeko.
About the Author
