Umugore w’imyaka 29 wo mu Karere ka Gatsibo, yishe umusaza w’imyaka 69 amukubise umwase mu mutwe nyuma y’ubushyamirane bwatangiye umugore abwiwe ko yicaye nabi mu kabari.
Ibi byabaye kumugoroba wo kuri uyu wa Kabiri tariki ya 25 Ugushyingo 2025, mu Mudugudu wa Kavumu mu Kagari ka Rubira mu Murenge wa Gitoki mu Karere ka Gatsibo.
Umwe mu baturage bo muri uyu Mudugudu waganiriye na IGIHE yavuze ko ahagana saa kumi z’umugoroba uwo mugore n’uwo musaza bari bari kumwe mu kabari, umusaza abwira umugore ko yicaye nabi.
Ibi ngo byakuruye gushyamirana bituma uwo mugore ajya hanze afata umwase awukubita uwo musaza bimuviramo guhita yikubita hasi, bamujyana kwa muganga apfira mu nzira.
Umunyambabanga Nshingwabikorwa w’umusigire w’Umurenge wa Gitoki, Manyunzwe Pierre Claver, yabwiye IGIHE ko uwo mugore akimara gukubita uwo musaza umwase yahise atabwa muri yombi.
Ati “Ni umugore n’umusaza bahuriye mu kabari, noneho baza gushyogozanya, noneho umudamu ahita afata umwase awumukubita mu mutwe, umusaza yahise agira ikibazo bamujyana ku kigo nderabuzima cya Gituza ahita yitaba Imana.’’
Gitifu Manyunzwe yasabye abaturage kwirinda kwihanira kuko bibakoresha ibyaha bishobora gutuma bafungwa igihe kirekire, abasaba kugana ubuyobozi bukabafasha mu gihe hari amakimbirane bagiranye na bagenzi babo.
Ati “ Ubutumwa dutanga ni uko dusaba abantu kwirinda kwihanira, niba hari ibyo mutumvikanyeho na mugenzi wawe nimugane ubuyobozi bubakiranure, abantu bajya mu kabari nibirinde kurenza amasaha cyangwa se no gusinda kuko biri mu byongera urugomo ruganisha kukwica umuntu, iyo rero ukoze ibyaha uba ugiye guteza ibibazo abo mu muryango wawe nawe utiretse.’’
Kuri ubu umurambo w’uyu musaza wajyanywe ku bitaro bya Ngarama kugira ngo ukorerwe isuzuma, mu gihe uyu mugore watawe muri yombi afungiye kuri sitasiyo ya RIB ya Kabarore.
About the Author
