Umuhanzi Davis D yinjiye mu bantu batangiye kunenga imyitwarire ya mugenzi we Element EleéeH ku rubyiniro, nyuma y’imyitwarire yagaragaye mu gitaramo cya Ray G cyabereye muri Stade ya Kakyeka, mu mujyi wa Mbarara, muri Uganda, ku itariki ya 1 Ugushyingo 2025.
Element EleéeH yari umwe mu bahanzi batoranyijwe na Ray G kugira ngo bamufashe gususurutsa igitaramo cye cyari cyitabiriwe n’abatari bacye. Nyamara uburyo yitwaye ku rubyiniro bwakuruye impaka n’impungenge mu bakurikiranira hafi uruganda rw’umuziki nyarwanda.
Prince Kiiz, umwe mu batunganya umuziki, ni we wabanje kugaragaza kutanyurwa n’uburyo Element yitwaye. Abinyujije ku mbuga nkoranyambaga, yavuze ko hari abahanzi batita ku bafana kandi ko bakwiye gufata umwanya wo kwitegura no gushyira imbaraga mu bitaramo.
Yagize ati: “Abahanzi bamwe muri gukora ibidakwiye. Abafana bakeneye kubahwa, ntimugire ubunebwe mu gihe muri imbere yabo.”
Ibi Davis D yabihamije mu kiganiro yagiranye na The Choice Live, ashimangira ko Element akwiye guhindura imyitwarire mu rwego rwo kubaha abakunzi b’ibihangano bye.
Ati: “Ni ngombwa ko umuhanzi aba yiteguye neza. Iyo ugiye gususurutsa abantu barenga ibihumbi mirongo ine, uba ugomba kubitwaramo neza. Ariko n’iyo baba ari bake, ntibivuze ko wabasondeka cyangwa ukaberekana nk’abatagira agaciro.”
Nubwo Davis D atanga ibi bitekerezo, hari amakuru aherutse kuvuga ko aba bombi bashobora kuba batacyumvikana neza nyuma y’indirimbo Berimuda Davis D yakoranye na Bushali na Bulldogg, ngo bitewe n’ibibazo byavuzwe mu bijyanye n’imikoreshereze y’amafaranga mu itunganywa ry’iyo ndirimbo.
Ubu Element EleéeH aherutse gusohora indirimbo nshya yitwa Maaso, kandi biravugwa ko afite gahunda yo kuyamamaza muri Tanzania mu minsi iri imbere.
About the Author
