Impuzamashyirahamwe y’Umupira w”Amaguru muri Afurika (CAF), yahanishije Umurundi Girumugisha Jean Claude kumara imikino itatu adakina inamuca ihazabu ya $ 5,000 (FBU miliyoni 14.7) kubera imyitwarire mibi yagaragarije i Kigali.
CAF yahannye uyu rutahizamu w’ibumoso, nyuma y’ubushyamirane bwakurikiye umukino w’amatsinda ya CAF Champions League ikipe ya Al Hilal Omdurman yo muri Sudani Girumugisha akinira iheruka gutsindamo MC Alger yo muri Algérie ibitego 2-1.
Ni umukino wabereye kuri Stade Amahoro i Remera, ndetse Girumugisha yawitwayemo neza cyane.
Raporo Komiseri w’umukino yashyikirije CAF, yashyize mu majwi Girumugisha imushinja kuba ari we wabaye intandaro y’ubushyamirane bwabaye, kuko nyuma y’umukino yagaragaje imyitwarire yo gushotora abakinnyi ba MC Alger.
Usibye uyu rutahizamu, CAF yanahagaritse ‘Performance Analyst’ (ushinzwe gusesengura uko ikipe yitwaye mu kibuga) Walid Sharshari imikino itatu na we inamuca ihazabu ya $ 5,000, na ho Al Hilal nk’ikipe icibwa amande ya $ 15,000.
Ni ibihano iriya kipe muri iki gihe iri gukina shampiyona y’u Rwanda yateye utwatsi binyuze mu munyamategeko wayo witwa ‘Pedro’, ivuga ko igomba kubijuririra.
About the Author
