Urubanza rujyanye n’ubujura bwageragejwe kuri Banki yitwa Rawbank i Kinshasa rwahinduye isura, abasirikare n’abapolisi bagaragaye mu mashusho ari bo barimo kwiba banki.
Ku wa Kabiri tariki 11 Ugushyingo, 2025 uru rubanza rwari rwakomeje mu rukiko rwa Gisirikare, i Kinshasa – Gombe.
Byaje guhindura isura ubwo mu rubanza herekanywe amashusho agaragaza ibyabaye tariki 16 Ukwakira, 2025 ubwo kuri Rawbank ku manywa y’ihangu habaga igikorwa cy’ubujura hakiyambazwa abapolisi n’abasirikare ngo bakiburizemo.
Amashusho yagaragajwe yerekana abapolisi n’abasirikare bari bagiye gucunga umutekano, bamwe binjiye ahabikwa amafaranga barayiba, abandi basatse imifuka y’imyambaro y’umugore witwa Honorine Porsche, ufite ubwenegihugu bw’Ubudage ariko akaba akomoka muri Congo Kinshasa, ndetse akaba ari we wari uyoboye biriya bikorwa by’ubujura, batwara amafaranga yari yibye.
Urukiko rwasabye Ubushinjacyaha gushakisha bariya bashinzwe umtekano bagaragaye mu mashusho bukabageza imbere y’inzego zishinzwe imyitwarire yabo.
Urukiko kandi rwategetse umushinjacyaha wa gisirikare gutegura ibihano bijyanye n’imyitwarire, n’ibiteganywa n’amategeko kugira ngo bizagarukweho mu iburanisha ritaha, no gupfundikira urubanza.
Honorine Porsche watawe muri yombi n’abasirikare ndetse akaza kwamburwa ubusa buri buri, yari yabwiye urukiko ko amafaranga yari yibye muri Banki, abasirikare n’abapolisi bayatwaye.
Urubanza rujyanye na buriya bujura bwakorewe kuri banki ruzakomeza tariki 14 Ugushyingo, 2025 nibwo ababuranyi bazavuga batanga imyanzuro yabo.
About the Author
