Chairman wa APR FC, Brig. Gen Deo Rusanganwa, yavuze ko abafana b’amakipe bakunda bakwiye kwihangana no gusubiza umutima hamwe aho guhangayika cyane igihe batsindwa.
Mu kiganiro yagiranye na Isibo Radio ku wa 27 Ugushyingo 2025, yasabye abafana kubona ko gutsindwa ari ibisanzwe, ndetse ko mbere yo kunenga bagomba kubanza kureba ibyo ubuyobozi bw’ikipe bukora.
Rusanganwa yavuze ko hejuru y’uko abafana bagira amarangamutima menshi, gukabya ntacyo bimara. Yatanze urugero rwa Liverpool na Manchester United zagiye zitsindwa imikino myinshi n’ubwo zifite abakinnyi bahenze. Ati: “Abafana bagomba kureba aho duturuka n’icyo dukora.”
Yibukije ko no kwa Rayon Sports bamaze imyaka myinshi batari gutwara igikombe, ariko abafana babo baguma kwihangana. Ati: “Nonese abafana ba Rayon baziyice? Oya, byose bisaba kwihangana.”
Ku kijyanye n’umutoza Abderrahim Taleb, Chairman yavuze ko ari hakiri kare ngo abantu bamucire urubanza kuko akiri kubaka uburyo bwe bw’imikinire. Yavuze ko abakinnyi baturutse ahantu hatandukanye kandi ko umutoza arimo gushaka uko yahuza uburyo bw’imikinire bwe n’ikipe.
Yongeyeho ko nubwo hari ibyo we ubwe abona bikitagenda neza, bitavuze ko umutoza nta bushobozi afite. Yasabye abasesenguzi n’abafana kudacira umutoza imanza zitarimo ishingiro.
Nubwo ubuyobozi bumushyigikiye, benshi mu bafana ba APR FC bakomeje kunenga umutoza bavuga ko uburyo akoresha butanga umusaruro muke, cyane cyane nyuma y’imikino itandukanye ikipe itabashije kwitwara neza, n’ubwo iheruka gutsinda Marine FC 2-1 bigoranye.
About the Author
