Abantu 27 bo mu Karere ka Kamonyi, barimo abagore 18 n’abagabo icyenda, batawe muri yombi bakekwaho gukwirakwiza inyigisho z’ubuyoboye zishishikariza abantu kutitabira gahunda za Leta zirimo nko gufata indangamuntu, Mituweli n’izindi.
Abafashwe ni abo mu tugari dutandukanye tw’Umurenge wa Nyarubaka ho mu Karere ka Kamonyi, guhera ku wa 21 kugeza ku wa 24 Ugushyingo 2025, aho bakurikiranweho kwigomeka no kugumura abandi baturage.
Amakuru aturuka mu bice batuyemo avuga ko abafashwe bose ari abantu batubahiriza gahunda za Leta bitwaje imyemerere, ariko bakaba batagira idini rizwi mu rwego rw’amategeko, ariko bagahuriza ku kuba ngo barahoze mu idini ry’abadivantisiti b’Umunsi wa Karindwi ariko nyuma bakitandukanya nabo.
Umuvugizi wa Polisi mu Ntara y’Amajyepfo, CIP Kamanzi Hassan, yabwiye IGIHE ko aba baturage batawe muri yombi kuko bagendaga bashuka abaturage bababwira ko gufata indangamuntu ari ibya satani, gufata mituweli atari byo, ko kwivuza bidakenewe n’ubundi buyobe.
Ati “Ubu bagendaga bavuga ko indangamuntu koranabunga ari ibya shitani, bakagenda babibwira abaturage, kandi ibyo Polisi ntabwo yabyihanganira kuko ni ibintu biciriritse. Ubu bose bafashwe, bafungiye kuri Polisi, Sitasiyo ya Rukoma, kugira ngo bakomeze kwigishwa ko ibyo barimo atari byo, ko kwigisha abantu kwanga gahunda za Leta ari icyaha gihanwa n’amategeko.’’
CIP Kamanzi, yakomeje asaba abaturage kujya bihutira gutanga amakuru aho babonye abigisha ibinyoma nk’ibi, ndetse no kutumvira abantu nk’aba bafite imyumvire idahwitse, ahubwo bagahora bari maso no gukomeza kwima amatwi abantu nk’abo.
Ibikorwa nk’ibi byaherukwaga no kuvugwa mu Karere ka Nyamagabe, mu Murenge wa Gatare, aho abaturage bari baranze kubahiriza ingamba zo kwirinda COVID-19.
Ababikora akenshi usanga bahonyora uburenganzira bw’abana babyara, kuko usanga batabajyana mu ishuri, ntibabavuze, ntibabandikishe, cyangwa bo babakingize. Hari n’abo usanga batarya ibiryo bifite intungamubiri kuko haba harimo nk’abatarya inyama, amagi, cyangwa ngo banywe amata; ibi bigatuma abo babyara bagwingira.
About the Author
