The Ben na Bruce Melodie bamaze gufungura umurongo w’urugamba rwo guhanganira kureba ukunzwe kurusha undi mu muziki w’u Rwanda, ibi bakazabigaragariza mu gitaramo kizabera muri BK Arena ku wa 1 Mutarama 2025.
Uru rugamba rwo gucyocyorana rwatangijwe na The Ben ubwo yamamazaga igitaramo cye cyo ku wa 1 Mutarama 2025, akoresha ifoto igaragaza ibipfunsi by’abateramakofe babiri bahanganye.
Ni ifoto yaherekesheje amagambo agira ati “Ku wo bireba, Ibeshye use n’ugerageza kunkinisha wirebere.”
Bruce Melodie n’ubusanzwe uzwiho kutaripfana, yifashishije imbuga nkoranyambaga ze, yafashe amashusho aherutse gukora akubita umuntu mu kibuga cy’iteramakofe, arangije agira ati “Witonde mu kungerageza kuko nsubiza bihabanye n’uko wibwira.”
Uku gucyocyorana kw’aba bahanzi ni inzira batangiye izabageza tariki 1 Mutarama 2026 ubwo bazaba bahurira muri BK Arena mu gitaramo bahaye intero igira iti #Whoisthebest mu rwego rwo kwanzura umwiza mu muziki w’u Rwanda kurusha undi.
Aba bahanzi nubwo baherutse kwemeranya guhurira mu gitaramo, mu byo bumvikanye harimo kutazoroherana mu guhanganira kwerekana urusha undi abafana no kugira imiziki yishimirwa nabo.
Uru rubanza byitezwe ko ruzaciribwa muri BK Arena mu gitaramo ‘The New Year Groove’ The Ben agiye gutegurira bwa kabiri muri BK Arena nyuma y’icyabaye tariki 1 Mutarama 2025.
Uretse iki gitaramo cya The Ben, aba bahanzi bategerejwe no kuzataramana mu bitaramo bizazenguruka Igihugu bya Bruce Melodie mu 2026.
About the Author
