Umuhanzikazi w’indirimbo zo kuramya no guhimbaza Imana, Aline Gahongayire, yahumurije byimbitse Ishimwe Vestine wo mu itsinda Vestine na Dorcas, mu mugambo yubakiye ku gukomera ku Mana yamenye, no gutegereza amasezerano rurema yamuvuzeho.
Mu ijoro ryo kuri uyu wa Kabiri, tariki ya 18 Ugushyingo 2025, Gahongayire yanyujije ubutumwa bwe kuri konti ya Instagram, abuherekeresha ifoto ya Ishimwe Vestine mu kugaragaza ko amagambo ari we yayageneye, arenzaho na ‘Tag’ y’iri tsinda uyu mugore abarizwamo.
Byari nyuma y’amasaha make Vestine Ishimwe atangaje ko atameze neza, mu butumwa bwaciye igikuba ku mbuga nkoranyambaga, aho yagaragaje ko afite intimba n’umubabaro ukomoka ku byemezo yigeze gufata mu buzima bwe, n’uburyo urukundo rwamugizeho ingaruka mbi.
Vestine yanditse ati “Ubu buzima mbayemo si bwo buzima nahisemo. Ndi mu bihe bibi kandi sinari mbikwiye… Nta mugabo uzongera kumbeshya ngo ansenyere ubuzima na rimwe.”
Yongeraho ati: “Umugabo nzongera guhitamo nzabanza kumumenya bihagije—menye imico ye, umuryango we, ibyo ahagazeho n’ubuzima bwe muri rusange. Nta muntu uzongera kunkoresha cyangwa kunkinisha.”
Gahongayire wamamaye mu ndirimbo nka ‘Ndanyuzwe’, yavuze ko yifatanyije na Ishimwe Vestine muri ibi bihe bikomeye arimo, amwifuriza kurindwa n’amaraso ya Yesu, ndetse amwibutsa ko ari “umunyamugisha” uko byagenda kose.
Mu butumwa bufite ishyaka ryo kumuhumuriza, Aline yagize ati: “Mfashe uyu mwanya, nka mukuru wawe mu rugendo rwo kuramya Imana, ntesheje agaciro imbaraga zose mbi zarwanya umugambi w’Imana ku buzima bwawe. Ijambo ribi ryose ryavuzwe ryavugwa cyangwa ryatekerezwa ku buzima bwawe, nditesheje agaciro mu izina rya Yesu.”
Yamubwiye ko agomba guhungira ku mavi, aho abaramyi bakura imbaraga n’uburinzi, amubwira ko imbere he ari heza kandi ko Yesu azongera kumuha ijambo rishobora gucecekesha imiraba yose arimo gucamo.
Yungamo ati: “Ku mavi yawe, aho ni ho haba inyegamo y’abaramyi, ujye uhahungira. Komera kandi uhore utekanye. Ndizera ko Yesu waguhaye ijambo rimwe, ari we ukongera noneho akaguha ijambo rishobora gucecekesha imiraba yose y’ubuzima bwawe.
Aline yakomeje amwizeza ko ejo hazaza he hari mu maboko y’Imana, niko gutangaza amagambo akomeye yahumurije benshi. Ati “Nanze ikibi cyose cyakugirira nabi. Uzubaka, uzabyara, uzaheka, uzaramya kandi uzahimbaza Imana. Erega wahawe ijambo, kandi byemewe n’Uwaryivugiye.”
Yamwibukije ko ari Imana yamuhagurukije, ko ari ishema ry’urungano, arangiza amubwira ko nta ntwaro zigerageza kumurwanya izagira icyo imutwara, ati “Guma mukubaho kwa Papa w’ibyiza. Nta ntwaro bacuriye ku kurwanya izagira icyo igutwara. Ndagukunda.”
Ubutumwa bwa Gahongayire bwakomeje guhumuriza benshi by’umwihariko abafana ba Vestine na Dorcas, binagaragaza ukuntu umubano n’ubufatanye mu muziki w’u Rwanda bukomeje kuba isoko y’ihumure no gushyigikirana mu bihe bitandukanye.
About the Author
