Umuvugizi wa Polisi y’Igihugu, ACP Rutikanga Boniface yamaze amatsiko abatekereza ko imodoka zitwara imizigo zo mu bwoko bwa Howo zaba ari zo ziteza impanuka cyane mu gihugu, avuga ko nta kibazo cya tekiniki zifite.
ACP Rutikanga yashimangiye ko izi modoka atari na zo za mbere ziteza impanuka, kuko zitarenza na 2% by’impanuka zibaho mu gihugu.
Ibi yabigarutseho mu kiganiro aherutse kugira n’itangazamakuru rikorerea mu Ntara y’Amajyepfo, ikiganiro cyabereye mu Karere ka Kamonyi, cyakurikiye gahunda y’ubukangurambaga bwa ‘Turindane, tugereyo amahoro’.
Muri iki kiganiro, abanyamakuru batandukanye bagaragaje uko hari abaturage bakunze kwinubira impanuka zikorwa n’amakamyo ya Howo, bagakeka ko zaba zikoze nabi ari na yo mpamvu yaba ituma zikora impanuka ako bo bita kenshi.
Umuvugizi wa Polisi y’u Rwanda, ACP Boniface Rutikanga, yavuze ko ikibazo atari imodoka za Howo ahubwo na we atangazwa no kubona buri mpanuka ya Howo ihita ivugwa cyane inkuru kurusha izindi modoka.
Ati “Izi modoka (Howo), ntabwo ari zo zonyine zigwa mu gihugu, izakoze impanuka wasanga zitageze no kuri 2%.’’
ACP Rutakanga, yavuze ko imodoka za Howo ziri mu modoka zigezweho zagakwiye kuba zinizewe cyane mu muhanda kuko zirimo mudasobwa, kuko bishimangirwa n’abahanga kuko zikoze neza.
Ati ‘‘Ziriya modoka abahanga bavuga ko zubatse neza, zifite ikoranabunga ryiza ndetse ziberanye na ‘terrain’ yacu, kandi zirikorera, nta kibazo cy’umwihariko zifite.’’
“Ntabwo ndi umuvugizi w’iyi sosiyete, ariko muzashake umuntu uzi iby’imodoka, ababwire uburyo Howo yubatse. Ni imwe mu modoka zibashije imihanda yacu. Igisigaye ni ukumenya abazitwara no kumenya ngo zifite ikorabuhanga rimeze rite? Ese ndarizi?’’
ACP Rutikanga, yagaragaje ko hakenewe no guhugura abashoferi batwara imodoka za Howo, hakarebwa niba bafite ubumenyi bukwiye ku modoka batwara.
Ati ‘‘Igikwiye kurebwa ubu ni ese ibinyabiziga biza uyu munsi, abantu (abashoferi) bacu ni byo baba bigiyeho? Cyangwa yigira ku bindi kinyabiziga kindi akabona uruhushya rwo gutwara rwa ‘C’, yajya kubona akazi akakabona kuri Howo atigeze yigiraho! Iyo hadafashwe umwanya ngo ayimenye, ni byo biba ibibazo.’’
Yagaragaje ko imodoka za Howo zisanzwe zifashishwa ahubakwa imihanda n’ingomero z’amashanyarazi kandi ho zikora neza, akavuga ko bo bafata igihe cyo kwigisha abazikoresha imikorere yazo, ibilo zitarenza n’andi mabwiriza ya ngombwa no gukurikirana ko bikurikizwa.
ACP Rutikanga, yakomeje avuga ko Polisi izakomeza kwigisha kugira ngo impanuka zirusheho kugabanuka, ariko ashimangira ko impanuka zikorwa na Howo ari nkeya ugereranije n’izindi modoka ziri mu gice cy’ubwikorezi.
Umuvugizi wa Polisi y’u Rwanda, ACP Rutikanga Boniface yatangaje ko mu mezi atatu aheruka, mu Ntara y’Amajyepfo habaye impanuka zo mu muhanda zikomeye 65 zica abaturage 53.
About the Author
