Umurambo w’umukobwa utazwi wasanzwe mu cyuzi giherereye ku Kinamba i Kabgayi, ahagana saa moya za mu gitondo cyo kuri uyu wa Gatandatu taliki ya 15/11/2025.
Bamwe mu baturage bageze aho uyu murambo wari uri, bakeka ko Nyakwigendera yishwe bakamujugunya mu cyuzi cyuhira imyaka giherereye ku Kinamba iKabgayi.
Umwe yagize ati: ”Bishoboke ko abamwishe bamujugunye mu cyuzi, kugira ngo bajijishe byitwe ko yiyahuye.”
Uyu muturage watanze amakuru, yabwiye UMUSEKE ko nta mwenda uyu mukobwa yari yambaye, akavuga ko byatunguye abantu bose bahageze.
Umuvugizi wa Polisi mu Ntara y’Amajyepfo, CIP Hassan Kamanzi avuga ko Polisi na RIB bakimara guhabwa amakuru y’urupfu ry’uyu mukobwa, bihutiye kujyayo basanga nyakwigendera koko nta kintu yambaye.
Ati: ”Ashobora kuba yishwe, ashobora kuba yaguyemo byose birashoboka.”
Umuvugizi wa Polisi avuga ko byose biza kuva mu iperereza ryatangiye gukorwa. Ati: ”Ukuri kwa nyako tuzaguhabwa n’ibivuye mu iperereza ryimbitse RIB irimo gukora.”
Nta mwirondoro w’uyu mukobwa wabashije kumenyekana kuko bamwe mu baturage bahageze batigeze bamumenya. Umurambo wajyanywe mu Bitaro bya Kabgayi gukorerwa isuzuma.
About the Author
