Minisitiri w’Ibikorwaremezo, Dr. Gasore Jimmy yatangaje ko mu rwego rwo gufasha Abanyarwanda kubona amacumbi ahendutse, kugeza no ku bafite amikoro make cyane, hari gutekerezwa imishinga yo kubaka inzu zo gukodesha zidahenze harimo n’iza rusange.
Ibyo Dr. Gasore yabibwiye abadepite ubwo yasobanuraga ibikubiye muri politiki nshya y’imitunganyirize y’imijyi.
Ni politiki igamije kongera umubare w’abaturage batura mu mijyi, aho intego ari uko abaturage batura mu mijyi bava kuri 27,9% bariho mu 2022 bakagera kuri 52% muri 2035 no kuri 70% mu 2050.
Dr. Gasore yavuze ko umuntu abarwa nk’uba mu nzu ihuye n’amikoro ye mu gihe ayikodesha kimwe cya gatatu cy’amafaranga yinjiza ku kwezi.
Yavuze ko ariko hari bamwe baba mu nzu aho usanga bazishyura ijanisha riri hejuru ya kimwe cya gatatu.
Yakomeje avuga ko Leta ifite gahunda yo kubaka amacumbi aciriritse izashingira kuri iyo mibare yo kuba abantu bishyura atarenga kimwe cya gatatu cy’ayo binjiza ku kwezi.
Ibyo bizakorwa mu mu byiciro binyuranye by’amikoro.
Kuri icyo kijyanye n’amikoro, Dr. Gasore yavuze ko hari abatifite cyane ku buryo ibijyanye no kubaka inzu zigeretse zituza benshi ku buso buto, cyangwa kubaka imidugudu nk’uwo mu Gitega bitatuma babona ayo bishyura inzu, ku buryo hari gutekerezwa hajya hubakwa inzu rusanga.
Ati “Tuzirikana ko hari umuntu udashobora kubona amafaranga, kandi na we akeneye gutura. Igitekerezo ni uko inzu ziri muri icyo cyiciro harimo n’izizaba zifite icyumba kimwe, uwo muntu azabona aho akodesha hatarenze kimwe cya gatatu cy’ayo yinjiza.”
“Ikindi ni uko turi mu mujyi kandi no mu yindi mijyi yose usanga hari ahantu hari icyumba kinini, abantu bagashyiramo ibitanda bakaryama. Ni ukwemera ko mu mujyi abantu bazabaho nk’abari mu mujyi. Hari ibyo tugomba kwemera kandi tukabitegura uko.”
Ubu buryo bwo kubaka inzu rusange zigashyirwamo ibitanda bikodeshwa, Dr. Gasore yavugaga i Dubai ni ibintu bimenyerewe mu bice nka Deira, Bur Dubai, Al Nahda n’ahandi kandi bifasha mu kubona amacumbi ahendutse.
Usanga umuntu yishyura gusa umwanya urimo igitanda cye n’ibindi bintu by’ingenzi, agasangira na bagenzi be ibindi birimo ubwiherero, ubwogero n’igikoni.
Ubwo buryo bugenewe abantu b’amikoro make kandi bakeneye gutura nk’abakozi badafite amafaranga menshi, abanyeshuri n’abandi.
Iyo umuntu akeneye kubona icumbi muri ubwo buryo ashaka ahaboneka ayo macumbi, bakagirana amasezerano y’imikoranire nk’uko abakodesha inzu bose bigenda.
Iyo ibyo bamaze kubyemeranyaho, ahabwa ahantu mu nzu rusange agasangamo igitanda n’utundi tuntu duke tw’ibanze nk’akabati k’imyenda.
Ni ukuvuga ko atari ibitanda nka bimwe byo muri ‘dortoirs’ z’abanyeshuri, ahubwo twabigereranya n’akumba gato kuko hagati yabyo haba hagiye hagabanyishijwe za ‘triplex’ nka kuriya mu nzu z’amagorofa bagabanyamo ibyumba.
Ubwo buryo, nubwo bushingiye ku masezerano hagati y’ukodesha na nyir’inzu, bugenzurwa n’ubuyobozi bw’imijyi ndetse n’ibigo bishinzwe imiturire bifasha gukurikira no gukemura ikibazo cyose cyazamo.
About the Author
