Mu gihe umuziki nyarwanda ukomeje gutera imbere, bamwe mu bawugize bagenda bahura n’ibigeragezo bitandukanye bitari mu rwego rw’ubuhanzi.
Umuhanzi Yampano, uzwi mu ndirimbo zibyinitse n’ubutumwa bwimbitse, yahuye n’ihungabana rikomeye ubwo amashusho ye y’urukozasoni yasakazwaga ku mbuga nkoranyambaga. Ubu yamaze gutanga ikirego muri RIB, asaba ko uwayasakaje ahanwa n’amategeko.
Yampano, amazina ye y’ukuri ni Florien Uworizagwira, yatangarije InyaRwanda ko tariki ya 9 Ugushyingo 2025 ari bwo yatanze ikirego cye mu Rwego rw’Igihugu rw’Ubugenzacyaha (RIB), asaba ko Ishimwe Patrick, uzwi nka Pazzo, akurikiranwa ku cyaha cyo gusakaza amashusho ari mu gikorwa cy’ibanga.
Ati: “Natanze ikirego tariki ya 9 Ugushyingo 2025, nyuma yaho Pazzo ahita afatwa tariki ya 11 Ugushyingo 2025.”
Uyu muhanzi wamamaye mu ndirimbo “Ngo” yakoranye na Papa Cyangwe, avuga ko we na Pazzo bigeze kubana mu nzu imwe mu Kagari ka Busanza, mu Murenge wa Kanombe, aho bari basangiye ubuzima bwa buri munsi n’imishinga y’umuziki.
Pazzo ngo yamufashaga mu bijyanye no gucunga imbuga nkoranyambaga ze no gusangiza abakunzi be ibikorwa bye bishya, ibintu byamugize umuntu wizewe mu buzima bwa Yampano bwa buri munsi.
Yampano asobanura ko amashusho yasakaye yafashwe muri Gicurasi 2025, igihe yari kumwe n’umukunzi we. Bari babifitiye ubushake bombi, ariko bagamije kwifatira urwibutso rwabo bwite, atari ibizajya hanze.
Nyuma yo gufata ayo mashusho, ngo yayabitse kuri konti ye y’ibanga, ariko icyo gihe yari akibana na Pazzo.
Kuba uyu musore ari we wari ushinzwe imbuga nkoranyambaga ze, byatumye ashobora no kugera kuri telefoni ya Yampano ndetse no kubona ayo mashusho.
Ibyari ubufatanye byahindutse isoko y’amakimbirane ubwo Yampano yasabaga Pazzo kwimuka mu nzu babanagamo, kugira ngo abone umwanya wo kubana n’umukunzi we mu buzima bwite. Ngo icyo gihe Pazzo yasabye amafaranga ibihumbi 500 Frw kugira ngo abashe gutangira ubuzima bushya.
Yampano avuga ko yabanje kumuha ibihumbi 300 Frw, ariko undi yanga kugenda. Nyuma ngo yamuhaye amafaranga yose, ariko na bwo akomeza kwinangira.
Nyuma y’icyo gihe, umubano wabo wahindutse, ndetse hatangiye kuvugwa amakuru ko Pazzo afite amashusho y’urukozasoni ya Yampano. Byaje kuba agahomamunwa ubwo ayo mashusho yasakazwaga ku mbuga nkoranyambaga hagati ya tariki ya 9 n’iya 10 Ugushyingo 2025.
Nubwo ibi byabaye byamuhungabanyije, Yampano avuga ko atigeze ahagarika ibikorwa bye by’umuziki. Yemeza ko akomeje urugendo rwe nk’umuhanzi kandi ko kuri uyu wa Kane, tariki ya 13 Ugushyingo 2025, azashyira hanze Extended Play (EP) ye ya mbere.
Yongeraho ko ibyo byabaye byose yabifashe nk’isomo ryo kumenya abo agirana ubucuti n’ubufatanye, ndetse agasaba abandi bahanzi kwitwararika mu bijyanye n’amabanga yabo y’ibanga.
Uyu muhanzi avuga ko yizeye ubutabera, kandi ko azakomeza gukora umuziki we nk’uko bisanzwe. Afite gahunda yo kujya mu gitaramo i Paris, mu Bufaransa, tariki ya 17 Ugushyingo 2025, aho azaririmbira abakunzi be mu mahanga.
Nubwo asanga byose byari umugambi wo kumuhindanyiriza isura mu gihe yiteguraga ibyo bitaramo, Yampano aravuga ko atazemera ko icyaha gisakaza amabanga y’abantu gihin
About the Author
